Entreprenør valt for Måbø bru
Mesta AS avdeling Førde vann entreprisen om å oppgradere rasteplassen Måbø bru langs Nasjonal turistveg Hardangervidda.
-Vi er svært godt nøgde med å signere kontrakt med ein dyktig entreprenør, seier Per Finborud, strekningsansvarleg for Nasjonal turistveg Hardangervidda i Statens vegvesen.
Måbø bru er ei steinkvelvbru frå 1910 over elva Bjoreio i Måbødalen. Brua og gamlevegen er eit freda kulturminne og vart tatt ut av bruk då den nye traseen for riksveg 7 stod klar i 1986. Rasteplassen på nedsida av brua blir no oppgradert med sitjebenkar, vegetasjon, rekkverk og universelt utforma tilkomst, samt nedgraven renovasjon. 3RW arkitekter står for utforming av oppgraderinga, med ansvarleg arkitekt Sixten Rahlff.
Anleggsarbeida vart kunngjorde som ein open tilbodskonkurranse 3. januar og det kom inn 5 tilbod. Mesta AS er no tildelt oppdraget, med ein kontraktsum på kr. 3.340.000,- eks. mva. Anleggsarbeida vil starte i april og rasteplassen skal stå ferdig i september 2025.
Prosjektet er ein del av arbeidet med å ruste opp Nasjonal turistveg Hardangervidda i Måbødalen og ved Vøringsfossen til å bli ei heilskapleg reiseoppleving med gamle ferdselsvegar, kulturhistorie og turistvegprosjekta som viktige ingrediensar.
Byggherre: Statens vegvesen
Arkitekt: 3RW arkitekter